भौतिक पूर्वाधार विकास मन्त्रालय, कोशी प्रदेश अन्तर्गत साविकमा रहेका ७ वटा पूर्वाधार विकास कार्यालय र ४ वटा शहरी विकास तथा भवन कार्यालय एकीकृत गरि कोशी प्रदेश सरकारको २०८२ साल जेष्ठ १९ गतेको मन्त्री परिषदको निर्णयबाट स्वीकृत भई सडक, पुल, झोलुंगे पुल, आवास, भवन तथा शहरी विकास सम्बन्धी आयोजना संचालन गर्न एकीकृत कार्यालयको रुपमा भौतिक पूर्वाधार विकास मन्त्रालय अन्तर्गतको पूर्वाधार विकास निर्देशनालय मातहत रहने गरि मिति २०८२/०४/०१ गते कोशी प्रदेशका भौतिक पूर्वाधार विकास तथा स्वास्थ्य मन्त्री मा. श्री भूपेन्द्र राई ज्यूबाट यस पूर्वाधार विकास कार्यालय, खोटाङ को उद्घाटन भएको हो | यस कार्यालयको कार्यक्षेत्र सडक, पुल, झोलुंगे पुल, आवास, भवन तथा शहरी विकास सम्बन्धी आयोजना हेर्ने गरि खोटाङ जिल्ला रहेको छ | दिक्तेल रुपाकोट मझुवागढी नगरपालिका, दिक्तेलमा यस कार्यालयको मुख्य प्रशासनिक भवन अवस्थित रहेको छ |

पूर्वाधार विकास कार्यालय, खोटाङले प्रादेशिक लोकमार्ग, सडकहरू तथा पक्की पुलहरूको निर्माण, मर्मत-सम्भार र स्तरउन्नति गर्ने कार्य गर्दछ। यसै अन्तर्गत प्रादेशिक महत्वका झोलुंगे पुलहरूको निर्माण र मर्मत गर्ने, साथै सरकारी भवन, विद्यालय, स्वास्थ्य केन्द्र तथा अन्य सामाजिक र सार्वजनिक भवनहरूको निर्माण, मर्मत, सम्भार तथा स्तरउन्नति गर्ने जिम्मेवारी यस कार्यालयको रहेको छ। यस कार्यालयले शहरी विकास योजना अन्तर्गत शहरी पूर्वाधार निर्माण तथा सुधार गर्ने, सार्वजनिक तथा निजी क्षेत्रका साझा आयोजनाको कार्यान्वयन गर्ने, ठेक्का प्रक्रिया अनुरूप आयोजना कार्यान्वयनको रेखदेख, सुपरिवेक्षण र स्तरीकरणको काम गर्ने, निर्माण गतिविधिको समन्वय, निर्देशन, अनुगमन तथा मूल्याङ्कन गरेर सुशासन सुनिश्चित गर्ने कार्य गर्दछ। साथै सामाजिक समावेशिता, पर्यावरणीय प्रभाव मूल्याङ्कन र सामाजिक उत्तरदायित्त्वलाई प्राथमिकतामा राख्दै आयोजना कार्यान्वयन गर्दा वातावरणीय तथा सामाजिक चुनौतीहरूको समाधान गर्ने काम पनि गर्दछ।

यस कार्यालयले निर्माण कार्यका लागि कानुनी अनुमति प्राप्त गर्ने, कानुनी प्रक्रियामा उत्पन्न समस्या समाधान गर्ने, निर्माण योजनामा सम्बन्धित प्रशासनिक प्रक्रियाको पालना गर्ने, सार्वजनिक सम्पत्तिको गुणस्तर जाँच र प्रमाणित सामाग्री प्रयोग सुनिश्चित गर्ने जिम्मेवारी लिएको छ। वार्षिक प्रतिवेदन तयार गर्ने, सम्पन्न आयोजनाको कार्यक्षमता र परिणाम मूल्याङ्कन गर्ने, बैठक तथा छलफलमार्फत सिर्जनात्मक मूल्याङ्कन र सुधारका उपायहरूको प्रस्ताव गर्ने, विभिन्न तह, समुदाय तथा सरकारी निकायहरूसँग समन्वय गरी आयोजनाको कार्यान्वयनमा सहकार्य पु¥याउने काम समेत यस कार्यालयले गर्छ।

त्यस्तै, नयाँ प्रविधि र समयसापेक्ष निर्माण विधिहरूको प्रयोग गरी निर्माण कार्यलाई प्रभावकारी तथा खर्च-कटौती हुने ढंगले अघि बढाउने, बजेट व्यवस्थापन गर्ने, आयोजनाका लागि आवश्यक वित्तीय स्रोतको वितरण तथा अनुमान गर्ने, आर्थिक अनुशासन र खर्च नियन्त्रण गर्ने, आयोजना कार्यान्वयनलाई पारदर्शी र प्रभावकारी बनाउने कार्य पनि यस कार्यालयको रहेको छ।